RC MORO AUNDA TIMU YA VYOMBO VYA DOLA ILI KUHAKIKI MAJINA YA WAKAZI WALIOLIPWA FEDHA ZA FIDIA KUPISHA MRADI WA BWAWA LA KIDUNDA ILI KUBAINI HARUFU YA MALIPO ‘HEWA’

Na John Nditi, Morogoro

MKUU wa mkoa wa Morogoro, Dk Kebwe Stephen Kebwe ameunda timu maalumu inayojumuisha  vyombo vya ulinzi na usalama itakayoshirikiana na wataalamu wa uthamini  wa Serikali na wenyeviti wa vitongoji vya vijiji vya Bwila Chini na Kiburumo , kata ya Selembala , halmashauri ya wilaya ya Morogoro   ili kuhakiki  upya majina  ya  waliolipwa  fedha za fidia na Mamlaka ya Maji Safi na Maji Taka Dar es Salaam (DAWASA) kwa ajili ya  kupisha ujenzi wa mradi  wa  bawawa la Kidunda.

Mkuu wa mkoa amelazimika kuunda timu hiyo baada ya kusikiliza malalamiko ya wananchi wa vijiji hivyo   wakati wa mkutano  wa  hadhara uliofanyika katika kijiji cha Bwila Chini  na kuhudhiriwa na mamia ya wananchi wa vijiji hivyo.

Dk Kebwe alisema  , ameiunda timu hiyo  licha ya pande zote kueleza kwa udani namna zoezi la uhakiki na uthamini wa  makazi ya watu wa vitongoji vinane  vya vijiji hivyo  kuelezwa kuwa zoezi hili lilifanyika  kwa uwazi ulioshirikisha  wenyeviti wao wa vitongoji na malipo kufanyika baada ya taratibu zote za kisheria kufuatwa.

Kwa nyakati  tofauti  baadhi ya wananchi waliopewa furasa ya kuuliza maswali wakidai kuwa wapo baadhi ya watu wamelipwa fedha za fidia  wakati zi  wakazi wa vitongoji vya vijiji hivyo  wakiwa hawana nyumba wala mashamba .

“ Nimelazimika niunde  timu  ya baadhi ya wajumbe wa kamati za ulinzi na usalama  itakayoshirikiana na wataalam na viongozi wa serikali za vitongoji kuhakiki majina yote kwa ajili ya kujiridhisha  ili kubaini  endapo madai  ya  wananchi  yanaukweli ama laa   na yakiwa na  ukweli hatua za kisheria zitachukuliwa  kwa wahusika” alisema Dk Kebwe.

Alisema, utekelezaji huo utawahushisha timu ya awali ya kikosi kilichofanya kazi wakati wa zoezi la uthamini  siku za nyuma wakiwemo wa vyombo vya ulinzi na usalama ambao wataungana  na wengine wapya  kuendesha uhakiki wa majina ya waliolipwa.

Hata hivyo aliwataka wananchi wa vitongoji hivyo kuungana na timu hiyo  wakati wa kupitia uhakiki wa majina ya waliothaminiwa awali  hadi walipolipwa fedha za  fidia ili kubaini endapo kuna majina hewa.

“ Polisi (CID) Takukuru na Usalama wa Taifa watapita kuhakiki majina ya waliolipwa fidia katika kila kitongoji “ alisema Dk Kebwe na kuongeza kuwa

“ Timu hii mpya itashirikiana na wenyeviti wa vitongoji na wananchi wote wawe kwenye maaneo yao kila siku kitongoji kimoja na kazi hii inapashwa kuanza Jumatano ijayo…( Feb 28, 2018)  ili  kubaini watu waliolipwa hewa na Dawasa , endapo itabainika hatua kali za kisheria kwa waliohusika zitachukuliwa“ alisema  Dk Kebwe .

Mkuu wa mkoa pia , aliitaka Dawasa kutengeneza utaratibu kwa wale ambao hawakulipwa fedha za fidia  awamu ya kwanza na ya pili ingawa tayari walifanyiwa  uthamini lakini majina yao kukosekana kuonekana kwenye vitabu vya malipo  walipwe mara moja.

 Pia alitoa siku 14 kwa Dawasa na mthamini wa serikali kwa kushirikiana na watendaji wa idara ya afya kuharakisha  uthamini wa makaburi ili taratuibu za malipo ziweze kuchukuliwa na  wahusika kuipwa kwa mujibu wa sheria  kuwezesha uhamishwaji wa makaburi eneo la mradi wa bwawa la Kidunda ufanyike kwa kushirikisha wahusika kulingana na imani zao na dini .

Naye ,Mthamini Mwandamizi wa wizara ya Ardhi , Nyumba na Maendeleo ya Makazi, Robert Lisasi  akizungumza katika  mkutano huo wa hadhara alisema , zoezi hilo lilifuata taratibu zote za kisheria ambapo zaidi ya watu 1,700 walihakikiwa mali zao na kufanyiwa uthamini na walilipwa  fidia kulingana na bei zilizowekwa na serikali .

Hata hivyo alisema , katika zoezi hilo waliletwa  wathamini wageni kutoka nje ya mkoa huo ambao walishirikiana na wenyeviti wa vitongoji katika zoezi hilo na pia serikali ya mkoa kuwaongezea maofisa wa vyombo vya ulinzi na usalama kwenye timu hiyo ili kuondoa mianya ya rushwa na upendeleo .

Kwa upande wake, Meneja wa Miundombinu wa Dawasa , Mhandisi  John Kirecha  mbele ya mkutano huo alisema kuwa , Dawasa ilikuwa ni mwezeshaji na mlipaji wa fedha za fidia baada ya kuletewa vitabu vilivyopitishwa na mthamini wa serikali.

Alisema , vitabu hivyo vyenye orodha ya majina  vilisainiwa  na mamkala za serikali za vijiji, kata , wilaya na mkoa vikionesha majina na kiwango vya fedha kwa kila mmoja wao anayestahiki  kuliipwa,  isipo kuwa majina 15 hayakuweza kuonekana ndani ya vitabu  igawa tayari walihakikiwa na kuthaminiwa mali zao  kwa ajili ya kulipwa fedha zao.

Hata hivyo alisema , watu hao 15 tayari utaratibu wa kuandaliwa malipo unaendelea kufanywa  na mamlaka hiyo .

Nao baadhi ya wakazi wanaopaswa kuhama ili kupisha ujenzi wa bwawa la maji la Kidunda ambao walishalipwa fidia awamu ya kwanza nay a pili kwa nyakati tofauti walidai kuwa hawakulidhika na viwango hivyo na  baadhi ya watu waliolipwa  si wakazi wa maeneo hayo  na hawana nyumba wala mashamba.

Hivyo alimwomba mkuu wa mkoa kuunda tume ya kufuatilia majina ya watu waliopitwa fedha za fidia za kuhamishwa katika vijiji hivyo wakati hawakuwa na makazi wala mashamba ili ukweli uweze kubainika  na endapo watakuwepo washukuliwe hatua wao na wale walioshiriki kufanya mchezo huo.