ZANZIBAR YASHAURIWA KUCHANGAMKIA FURSA MBALIMBALI BAINA YAKE NA SERIKALI NA MAJIMBO NCHINI INDIA

Zanzibar imeshauriwa kuchangamkia furSa mbali mbali za ushirikiano

zinapokezea baina yake na Serikali za Majimbo Nchini India katika

sekta za Kilimo, Biashara, Uwekezaji, Afya na huduma za Mawasiliano

kutokana na Taifa hilo liliopo Barani Asia kupiga hatua kubwa ya

Maendeleo kwenye Sekta hizo.

Kauli hiyo imetolewa na Kaimu Balozi wa Tanzania Nchini India Balozi

Mohamed Hija wakati akikiongoza Kikao cha matayarisho cha Ujumbe wa

Zanzibar unaoongozwa na Makamu wa Pili wa Rais wa Zanzibar Balozi Seif

Ali Iddi ambao tayari umeshawasili Nchini humo kwa Ziara ya Kiserikali

ya Wiki Moja.

Balozi Mohamed Hija alisema Zanzibar ina fursa pana ambazo bado

haijazitumia katika kujitanua kimawasiliano kwa kushirikiana na

Taasisi mbali mbali Duniani katika harakati zake za kujikwamua

kiuchumi na kuimarisha mipango yake ya Maendeleo hasa kwenye zile

Sekta zilizo nje ya Muungano.

Alisema India imebarikiwa kuwa na Taasisi na Makampuni mengi kwenye

Serikali za Majimbo ambazo zinaweza kusaidia nguvu za Kiuchumi

Visiwani Zanzibar iwapo mipango ya uhakika itawekwa ukiwemo utaratibu

maalum wa kufuatilia makubaliano yanayofikiwa ya pande mbili husika.

Balozi Hija aliueleza Ujumbe huo wa Zanzibar kwamba Ofisi ya Ubalozi

Nchini India iko tayari kuratibu masuala yote yatayohusika na mikataba

au makubaliano baina na Zanzibar na Taasisi au Serikali ya Jimbo

lolote Nchini humokatika uanzishwaji wa ushirikiano wa kisekta.

Alifahamisha kwamba ipo miradi inayofikia hatua ya kutiwa saini katika

uanzishwaji wake lakini kinachokosekana kuibuka kwa miradi hiyo na

hatimae mengine kufifia ni ukosefu wa ufuatiliaji wa miradi hiyo jambo

ambalo huwavunja moyo wale wanao nia thabiti ya kusaidia.

Balozi Hija alielezea faraja yake kutokana na ujio wa Ujumbe huo wa

Zanzibar Nchini India na kusema kwamba huo ni mwanzo mzuri wa

kufungua njia itakayotoa mwanga kwa Zanzibar kujitanua zaidi kiuchumi

Kimataifa.

Naye kwa upande wake Makamu wa Pili wa Rais wa Zanzibar Balozi Seif

Ali Iddi alisema ziara hiyo ina lengo la kutengeneza Diplomasia juu ya

ushirikiano kati ya Zanzibar na India hasa katika sekta za Afya,

Kilimo, Biashara na hata Utalii.

Balozi Seif alisema India imekuwa mshirika mkubwa wa Zanzibar katika

Sekta ya Afya kiasi kwamba wagonjwa wengi wa Zanzibar wanaosumbuliwa

na maradhi tofauti kama Moyo, Figo pamoja na magonjwa mengine hupata

huduma za matibabu katika Hospitali za India.

Othman Khamis Ame

Ofisi ya Makamu wa Pili wa Rais wa Zanzibar

19/3/2017.

Kaimu Balozi wa Tanzania Nchini India Balozi,Mohamed Hija kati kati akielezea fursa mbali mbali zilizopo Nchini India ambazo Zanzibar inaweza kuzichangamkia kwenye kikao cha Ujumbe

wa Zanzibar uliowasili Nchini humo kwa ziara ya Wiki Moja.

Balozi Hija alikuwa akikiongoza Kikao cha matayarisho cha Ujumbe wa Zanzibar unaoongozwa na Makamu wa Pili wa Rais wa Zanzibar Balozi Seif Ali Iddi hapo kwenye Hoteli ya Kimataifa ya Eros – Nehru Palace iliyopo Mjini New Delhi India.

Wa kwanza Kulia ni Makamu wa Pili wa Rais wa Zanzibar Balozi Seif Ali Iddi na Katibu Mkuu Wizara ya Afya Bibi Asha Ali Abdulla. Wa kwanza Kushoto ni Mjumbe wa Baraza la Mapinduzi ambae pia ni Waziri asiye ya Wizara Maalum Dr. Sira Ubwa Mamboya na Naibu Waziri wa Nchi

Ofisi ya Makamu wa Pili wa Rais wa Zanzibar Mh. Mihayo Juma N’hunga.

Picha na – OMPR – ZNZ.