MIAKA 53 YA MAPINDUZI: DKT. MOHAMMED SEIF KHATIBU “MAPINDUZI YAMEONDOA MATESO KWA WAAFRIKA WA BARA NA VISIWANI”

Dkt, Mohammed Seif Khatibu

Na Judith Mhina - MAELEZO

Waziri katika Serikali ya Awamu ya Kwanza, Pili na ya Tatu ya Jamhuri ya Muungano wa Tanzania na Mtaalamu wa lugha ya Kiswahili, Dkt, Mohammed Seif Khatibu amesema Mapinduzi ya Zanzubar ya mwaka 1964 yalimaliza mateso ya muda mrefu waliyoyapata Waafrika wa Tanzania Bara na Visiwani.

Dkt, Mohammed Seif Khatibu amesema hayo alipohojiwa na Idara ya Habari - MAELEZO leo kuhusiana na mafanikio yaliyopatikana tangu mapinduzi ya Zanzibar yalipofanyika miaka 53 iliyopita. Amesema, Mapinduzi yameondoa madhila ya utumwa, masuria, kubaguliwa, kufanyishwa kazi, kudhalilishwa, kunyanyaswa, kudharauliwa na kuuzwa kama samaki:

“Inashangaza kuona Watanzania hawasheherekei ipasavyo Mapinduzi ya Zanzibar kwa kuwa kama si Mapinduzi hayo mateso na madhila kwa Waafrika wa Bara na Visiwani yangeendelea”. “Madhila ya Zanzibar hayawagusi Waafrika wa Zanzibar peke yake, bali pia Waafrika wa Tanzania Bara”.

 Aliongeza kwa kusema “Mapinduzi Daima” maana yake ni endelea kutekeleza yale yaliyokusudiwa na “Mapinduzi” usawa, umoja na mshikamano ambao utapatikana pale tu kila mtu akipata huduma bora za afya, elimu, maji, umeme na makazi bora ambayo kwa asilimia kubwa Rais wa Zanzibar Shekh Abeid Amani Karume alitekeleza.

Akizungumizia maadhimisho ya miaka 53 ya Maapinduzi ya Zanzibar Waziri huyo wa zamani amesema, Mapinduzi yaliyofanywa mwaka 1964 yanahitaji kuendelezwa kwa sababu yameleta ukombozi wa Waafrika, yameondoa utawala wa Uingereza na Waarabu. Kujitawala maana yake Wanzanzibar wanatakiwa  kufanya kazi kwa bidii, nidhamu na kujituma ili kujiletea maendeleo.

Alifafanua suala linalotiliwa mkazo na Rais Dkt Ali Mohammed Shein la nidhamu kazini alisema “Hili ni tatizo kubwa sana kwa Zanzibar, Wazanzibar wengi hawajali kazi hawaoni kama maisha yao yanategemea kazi mpaka imekuwa sehemu ya utamaduni wao kutothamini kazi. Hivyo, ni lazima mfumo mzima ubadilike na kuona watu wana wajibu wa kazi. Rais anahitaji kuungwa mkono katika hili maana akiachiwa mwenyewe hataliweza ni lazima tulichukulie kwa mtazamo wa pamoja.

Akijibu maswali mawili mosi, kuhusiana na lipi la kujivunia kutokana na Mapinduzi ya mwaka 1964 alisema: “Mpaka leo Mapinduzi yanakumbukwa naona fahari sana kwa hilo”. Kama sio Mapinduzi mpaka kesho Sultani angeendelea kutawala, kama sio yeye mwanae au mjukuu wake. Pia, dhamira ya kuzindua mipango na miradi mbalimbali ya maendeleo wakati wa maadhimisho hayo kunaendeleza dhamira ileile ya Mapinduzi iliyokusudiwa mwaka 1964.

Pili, kwa nini vyama vya siasa vya Upinzani vinalalamika kuwa Demokrasia inakandamizwa Zanzibar, alisema: “Nadhani hii ni tabia au hulka ya nchi za Afrika za kupinga kila kitu wakati wa uchaguzi ili mradi upande wa anayelalamika umeshindwa, lazima atasema uchaguzi sio huru na wa haki, hali kadhalika kwa upande mwingine. Lakini kwa yoyote anayeshinda uchaguzi ulikuwa huru na wa haki”.

Akitoa ushauri Dkt Khatib alisema “Mimi nadhani mambo ambayo Zanzibar wanaweza kufanyia  kazi ni mambo matatu. Kwanza viwanda vya samaki, pili utalii wa ndani katika utamaduni na kutembelea maeneo ya  kihistoria, mwisho Utalii wa matibabu kujenga hospitali nzuri yenye huduma zote, ili wakati watalii wanakuja Zanzibar anapata nafasi ya kupewa matibabu. Utalii huu ni maarufu sana nchi za Urusi na China.

Pia, kwa vijana wa Zanzibar wapewe maeneo ya ardhi Tanzania Bara waweze kulima na kuzalisha chakula ambacho kitapelekwa Zanzibar. Zoezi hili litatoa nafasi ya vijana kujifunza, kujiajiri  na kuwa na tabia ya kupenda kazi.

Mwisho alimalizia kwa kutoa wito kwa Serikali ya Mapinduzi ya Zanzibar na Jamhuri ya Muungano wa Tanzania kujenga makumbusho ya kisasa ili kizazi cha sasa na kijacho, waone, wajue na kujifunza nini kilitokea kabla ya Mapinduzi, kwa nini tunasheherekea Mapinduzi na kwa nini tunasema  tuko huru.

Huku akionesha msisitizo: “Ni vema kuonyesha katika picha na sura halisi historia ya Zanzibar kabla ya Waajemi, Wareno, Waarabu, Waingereza na sasa Mapinduzi”.

“Vijana wengi ukiwaambia nchi hii kulikuwa na unyanyasaji wa Waafrika hawakubali, maana kuna wasioitakia mema Zanzibar wanapotosha historia hiyo”.