Kitwanga awataka Watanzania kujifunza fursa Sekta ya Madini

Naibu Waziri wa Nishati na Madini anayeshughulikia Madini, Charles Kitwanga, akisisitiza jambo wakati wa ufunguzi wa mkutano wa kuimarisha ushirikishwaji wa watanzania katika sekta ya madini unaofanyika jijini Mwanza

Baadhi wa washiriki wa mkutano wa kuimarisha ushirikishwaji wa watanzania katika sekta ya madini wakifuatilia hotuba ya Naibu Waziri wa Nishati na Madini, Charles Kitwanga anayeshughulikia Nishati (hayupo pichani).

Kamishna Msaidizi wa Madini anayeshughulikia Migodi Mhandisi Ally Samaje akiwasilisha taarifa wakati wa mkutano wa kuimarisha ushirikishwaji wa watanzania katika sekta ya madini unaofanyika jijini Mwanza.

Naibu Waziri wa Nishati na Madini anayeshughulikia Madini, Charles Kitwanga (waliokaa katikati) akiwa katika picha ya pamoja na washiriki wa mkutano wa kuimarisha ushirikishwaji wa watanzania katika sekta ya madini.

Naibu Waziri wa Nishati na Madini anayeshughulikia Madini Charles Kitwanga amewataka watanzania kujifunza na kutafuta fursa zilizopo katika sekta ya madini yakiwemo matumizi ya teknolojia ili kuweza kushiriki kikamilifu katika sekta hiyo nchini.

Naibu Waziri Kitwanga ameyasema hayo wakati akifungua mkutano wa kuimarisha ushirikishwaji wa watanzania katika sekta ya madini unaofanyika jijini Mwanza na kuwataka wamiliki migodi kuwafundisha watoa huduma katika sekta hiyo namna bora ya ushiriki wao na hivyo kuchangia pato na ukuaji wa uchumi wa Tanzania.

“Wamiliki wa migodi wanatakiwa si kutoa fedha tu bali pia kuwafundisha watoa huduma katika migodi yao kuzitumia fursa zilizopo katika sekta hiyo, jambo hili litawezesha ushiriki wa watazania, litadumisha amani na hivyo lengo la serikali litafikiwa.

“ Hivi sasa sekta ya madini ndiyo inaongoza kwa kutoa fedha nyingi za kigeni madini yanapouzwa, hivyo uwepo wa watoa huduma wengi na wananunuzi watachangia zaidi kuimarisha uchumi kupitia madini”amesisitiza Kitwanga.

Kitwanga ameongeza kuwa, Serikali inalenga kuhakikisha kwamba, watanzania na serikali wanafaidika na shughuli za uchimbaji madini na kuongeza kuwa, lengo la serikali ni kuhakikisha kuwa, ifikapo mwaka 2025 sekta ya madini inachangia asilimia 10 ya pato la taifa kiuchumi.

Aidha, amewataka wamiliki wa migodi kuhakikisha wanatoa taarifa kuhusu fursa zilizopo kwa watoa huduma kwa kuzingatia usawa ili kuwawezesha watanzania kushiriki katika uchumi huo. “ Lazima watanzania washirikishwe , lazima shughuli za madini ziongeze mzunguko wa fedha na faida za uchumi huu tunataka zibaki ndani,” amesisitiza Kitwanga.

Vilevile, Kitwanga amesisitiza suala la kutii na kufuata sheria, kanuni na taratibu kwa wadau wote katika sekta hiyo wakiwemo wananchi na wachimbaji ili kuepusha migorogoro. Naye Kamishna wa Madini Tanzania, Mhandisi Paul Masanja amewaeleza washiriki wa mkutano huo kwamba serikali inataka kuona faida za shughuli za uchimbaji nchini zikiwanufaisha watanzania moja moja.

Washiriki wa Mkutano huo ni pamoja na Wataalamu kutoka Wizara ya Nishati na Madini, Taasisi zinazoshughulika na Masuala ya Madini nchini likiwemo Shirika la Madini la Taifa (STAMICO), Wakala wa Ukaguzi wa Madini Tanzania (TMAA), Mkuu wa Mkoa wa Geita Fatma Mwasha Mkuu wa Wilaya ya Geita Manzie Mangachie, Mkuu wa Wilaya ya Kishapu Wilson Nkhambaku na Wawakilishi wa Kampuni za Madini.