Singapore yaonyesha nia kubwa kuimarisha uwekezaji Tanzania

Mkurugenzi wa Kituo cha Uwekezaji nchini (TIC), Bi. Juliet Kairuki (kushoto) na Mkurugenzi wa Mashariki ya Kati na Afrika wa Singapore(kulia) wakitia saini makubaliano ya kubadilishana taarifa za kiuwekezaji baina ya nchi hizo mbili jijini Dar es Salaam jana. Wanaoshuhudia ni Mwanasheria mwandamizi wa kituo Bwana Alex Mnyani na na Naibu Mwenyeketi IE Singapore Co-operation Entreprise.

Mkurugenzi wa Kituo cha Uwekezaji nchini (TIC), Bi. Juliet Kairuki (kushoto) akibadilishana nyaraka na Mkurugenzi wa Mashariki ya Kati na Afrika wa Singapore(kulia) muda mfupi baada ya kuliana saini makubaliano ya kubadilishana taarifa za kiuwekezaji baina ya nchi hizo mbili jijini Dar es Salaam jana. Anayeshudia katikati ni Naibu Mwenyeketi IE Singapore Co-operation Entreprise.

Kampuni toka nchini Singapore zimeonyesha nia kubwa ya kuimarisha uwekezaji katika sekta mbalimbali nchini zikwemo raslimali za gesi na mafuta ambazo zinapatikana nchini.

Mkurugenzi Mtendaji wa Kituo cha Uwekezaji Tanzania (TIC), Bi. Juliet Kairuki aliwaambia waandishi wa habari kuwa tayari kuna kampuni toka nchi hizo zilizokwisha nunua hisa kwenye vitalu vya mafuta na gesi asilia.

Alikuwa akiongea baada ya hafla fupi ya kutiliana saini ya makubaliano kati ya TIC na IE Singapore Cooperation Enterprises toka nchi hiyo jana jijini Dar es Salaam.

“Tayari wengine wamesha nunua hisa kwenye uwekezaji wa mafuta na gesi asilia,” alisema.

Makubaliano hayo yanahusisha kubadilishana taarifa za uwekezaji kati ya Tanzania na Singapore kwa faida ya nchi zote mbili.

Makubaliano hayo kati ya TIC na kituo hicho toka nchini Singapore yalishuhudiwa pia kampuni nne toka nchi hiyo ambazo zimekuja nchini kuangalia mazingira ya uwekezaji nchini ili waweze kuanza kufuata taratibu za kuwekeza katika maeneo mbalimbali.

“Wamekuja kuangalia vivutio ambavyo Tanzania inatoa ikiwemo vya uhamiaji, kodi, vibari vya wageni kufanya kazi nchini, na ardhi kwa ajili ya uwekezaji,” alisema.

Aliongeza kusema kuwa mahusiano hayo yatasaidia kuendelea kuboresha maswala ya uwekezaji na kufanya biashara pamoja na hiyo itawavutia wawekezaji wengi kutoka nchi hiyo kuja nchini.

Alisistiza kwamba Serikali inavutia wawekezaji ili kupanua wigo wa kodi ili mapato ya nchi yaweze kuongezeka kwa ajili ya ujenzi wa miundombinu ya nchi ambayo inachangia maendeleo.

“Kituo kipo tayari kusaidia kupitia taratibu zake kuhamasisha na kuvutia uwekezaji zaidi nchini,” alisema.

Naibu Mwenyekiti, IE Singapore Cooperation Enterprises, Bw. Seah Moon Ming alisema ujio wao nchini Tanzania unalenga kuimarisha ushirikiano kati ya nchi yao na Tanzania katika nyanja za uwekezaji na biashara.

“Tunataka kubadilishana taarifa za kibiashara na uwekezaji kati ya nchi zetu ili kuleta maendeleo yetu sote,” aliongeza kusema Bw. Moon Ming.

Alisema baadhi ya makampuni yaliyofika yana ujuzi mkubwa katika maswala ya gesi asilia na mafuta.

Aliongeza kusema kuwa maeneo mengine ambayo wanapenda kuwekeza ni pamoja na sekta ya kilimo, mawasiliano, habari na teknolojia (TEHAMA) na mwaswala ya mipango miji.

Kampuni zilizokuja ni pamoja na Pavilion Energy, Temasek Holdings, na Singapore Cooperation Enterprise (SCE).