 |
| MHESHIMIWA MIZENGO P. PINDA (MB), WAZIRI MKUU WA JAMHURI YA MUUNGANO WA TANZANIA |
UTANGULIZI
1.
Mheshimiwa
Spika, tumekuwepo
hapa Bungeni, Dodoma kwa takriban siku 11 ambapo leo tunahitimisha shughuli
zilizopangwa katika Mkutano wa Kumi wa Bunge lako Tukufu. Nitumie nafasi hii
kumshukuru Mwenyezi Mungu mwenye wingi wa Rehema kwa kutufikisha salama siku ya
leo.
2.
Mheshimiwa
Spika, awali
ya yote naomba nitumie nafasi hii kutoa pole kwa Ndugu, Jamaa na Marafiki
waliopoteza Wapendwa wao katika ajali mbalimbali zilizotokea hapa Nchini,
ikiwemo ajali ya Jahazi la Sunrise
iliyotokea Wangwi katika Bahari ya Hindi na Ajali ya Lori kule Mbarali ambapo
Watu wamepoteza maisha na kupata majeraha. Aidha, tunawapa pole Majeruhi wote
na Abiria waliopoteza mali katika ajali hizo. Kwa kipekee kabisa napenda kutoa
pole kwa Ndugu, Jamaa na Marafiki wa Askofu Thomas Laiser wa KKKT, Dayosisi ya Kaskazini
Kati - Arusha ambaye amefariki jana Mchana na Askofu Mstaafu Amedeus Msarikie
wa Kanisa Katoliki, Jimbo la Moshi ambaye
amefariki Usiku wa kuamkia leo huko Nairobi alikokuwa anapata matibabu. Wote tunawapa pole sana!
SHUGHULI
ZA BUNGE
a)
Maswali
3.
Mheshimiwa
Spika,
katika Mkutano huu jumla ya Maswali 116
ya Msingi na 286 ya nyongeza
yalipatiwa majibu. Vilevile, Maswali 6
yaliulizwa na kujibiwa kwa utaratibu wa Maswali ya Papo kwa Papo kwa Waziri
Mkuu.
b) Miswada
4.
Mheshimiwa
Spika, katika
Mkutano huu, Miswada ifuatayo ilisomwa kwa mara ya Kwanza:
i)
Muswada wa Sheria ya Vyama vya Ushirika wa
Mwaka 2013 [The Cooperative Societies
Bill, 2013]; na
ii)
Muswada wa Marekebisho ya Sheria Mbalimbali
wa Mwaka 2013 [The Written Laws
Miscellaneous Amendments, Bill 2013].
5.
Mheshimiwa
Spika,
Muswada wa Marekebisho ya Sheria Mbalimbali wa Mwaka 2012 [The Written Laws Miscellaneous Ammendments (No. 3) Act, 2012]
ulisomwa kwa mara ya Pili na kupitia ngazi zake zote;
c) Hoja Binafsi za Wabunge
6.
Mheshimiwa
Spika,
katika Mkutano huu, pia Waheshimiwa Wabunge
walipata fursa ya kuwasilisha Hoja Binafsi kama ifuatavyo:
i)
Hoja Binafsi ya Mheshimiwa Mwigulu Lameck
Nchemba, Mbunge wa Iramba Magharibi ya kuitaka Serikali iwasilishe Bungeni
Muswada wa Sheria ya Uanzishwaji wa Mfuko wa Elimu ya Juu (The Higher Education Fund Act);
ii)
Hoja Binafsi ya Mheshimiwa James Francis
Mbatia, Mbunge wa Kuteuliwa kuhusu udhaifu ulioko katika Sekta ya Elimu Nchini;
iii)
Hoja Binafsi ya Mheshimiwa Dkt. Hamisi Andrea
Kigwangalla, Mbunge wa Nzega ya kuitaka Serikali ianzishe Mpango Maalum wa
Kukuza Ajira kwa Vijana na kuanzisha Mfuko wa Mikopo ya Vyama Wanaowekeza
kwenye Kilimo na Viwanda vyenye uhusiano wa moja kwa moja na Kilimo; na
iv)
Hoja Binafsi ya Mheshimiwa John Mnyika,
Mbunge wa Ubungo juu ya Kuboresha Upatikanaji wa Maji Safi na ushughulikiaji wa
Maji Taka katika Jiji la Dar es Salaam.
d) Maazimio
7.
Mheshimiwa
Spika, vilevile, katika Mkutano huu, Waheshimiwa
Wabunge waliweza kujadili na kupitisha Maazimio Mawili yafuatayo:
i)
Azimio la Bunge la Kujiunga na Mkataba wa
Kuzuia na Kuadhibu Uhalifu Dhidi ya Watu wenye Kinga ya Kimataifa pamoja na
Wakala wa Ki-Diplomasia (Convention on
The Prevention and Punishment of Crimes Against Internationally Protected
Persons Including Diplomatic Agents 1973); na
ii)
Azimio la Bunge la Kujiunga na Mkataba wa
Kimataifa wa Kuzuia Vitendo vya Ugaidi wa Kutumia Nyuklia (International Convention for Suppression of Act of Neuclear Terrorism, 2009).
Ninawashukuru
Waheshimiwa Wabunge kwa kukamilisha Mijadala hiyo.
UJENZI
WA UMOJA WA KITAIFA
8.
Mheshimiwa
Spika, kwa
namna ya pekee Taifa letu limejaliwa na Mwenyezi Mungu kutimiza miaka zaidi ya 51 sasa ya Uhuru likiwa bado linaendelea kudumisha
Umoja wa Kitaifa. Umoja huu
wa Kitaifa umejengwa kwenye nguzo na misingi imara ya Amani, Utulivu na Mshikamano.
Mimi naamini sote tunapaswa kujivunia Umoja huu wa Kitaifa ambao ni Tunu kubwa
na nguzo muhimu ya maendeleo yetu. Msingi mkubwa wa Umoja wa Kitaifa
tunaoshuhudia leo uliwekwa na malezi mazuri ya Waasisi wa Taifa hili
wakiongozwa na Baba wa Taifa, Mwalimu Julius Kambarage Nyerere na Hayati Abeid Amani
Karume. Aidha, Katiba ya Jamhuri ya Muungano wa Tanzania inasisitiza, pamoja na
mambo mengine, kujenga Jamii inayozingatia misingi ya Uhuru, Haki, Udugu na
Amani. Ni jukumu la kila Mwananchi kulinda Umoja huu ambao hauna mbadala.
9.
Mheshimiwa
Spika, Nchi
yetu ina Makabila zaidi ya 120 ambayo
kwa Mujibu wa Takwimu za Sensa ya Watu na Makazi ya Mwaka 2012 yamefikisha
Idadi ya Watu Milioni 44.929. Aidha,
hivi sasa tuna Madhehebu ya Dini yaliyoandikishwa takriban 885 na Mashirika Yasiyo ya Kiserikali zaidi ya 6,675 na tumejenga Demokrasia ya Vyama vingi vya Siasa ambapo hadi
sasa tuna Vyama vya Siasa 19 ambavyo
vimepata Usajili wa Kudumu. Licha ya kuwepo kwa Idadi kubwa ya Watu wa Makabila
tofauti yenye desturi mbalimbali na makundi mbalimbali ya Madhehebu ya Dini,
Itikadi za Kisiasa na Watu wenye Rangi mbalimbali, bado tunajivunia kwamba tunaheshimiana
na hatubaguani kwa namna yoyote ile. Hali hii ya amani imeipatia Nchi yetu sifa
Kitaifa na Kimataifa na mfano wa kuigwa.
10.
Kutokana na Demokrasi pana iliyopo, Wananchi
wetu wana Uhuru mkubwa wa kutoa maoni, kuanzisha na kujiunga na Vyama vya Siasa
pamoja na kushiriki katika kuchagua Viongozi wa Chama chochote wanachokipenda
kwa kuzingatia Misingi ya Katiba na Sheria za Nchi. Vilevile, Serikali imetoa
uhuru mkubwa wa kupata na kutoa habari kwa uwazi bila vikwazo vyovyote kwa
kuzingatia Katiba, Sheria na Kanuni mbalimbali na Maadili ya Vyombo vya Habari.
Kutokana na Uhuru huo, Idadi ya Vyombo vya Habari imeongezeka sana ambapo hadi
sasa Idadi ya Vituo 86 vya Redio vilivyopewa
Leseni na vinafanyakazi, Vituo vya Televisheni 26 na Magazeti 768
yaliyoandikishwa na yanayotolewa na Taasisi mbalimbali.
11.
Mheshimiwa
Spika, pamoja
na mafanikio hayo yanayodhihirika wazi, hivi karibuni kumekuwepo na dalili za
kupoteza sifa yetu nzuri ya Umoja wa Kitaifa na Amani ambayo imedumu kwa miaka
mingi. Tumeshuhudia Wananchi mmoja mmoja wakishindwa kuvumiliana, japo kwa
tatizo dogo tu miongoni mwao. Aidha, tumeshuhudia Vyama vya Siasa vikionesha
dalili ya kuhamasisha Wanachama wao kuingia kwenye malumbano
ya Siasa baina
yao wenyewe kwa
wenyewe au baina ya Chama kimoja cha Siasa na Chama kingine. Baadhi ya
Wanachama wameshikana mashati na kujeruhiana.
12.
Mheshimiwa
Spika, napenda
kutumia fursa hii kuwaasa Viongozi wa Vyama vya Siasa kuepuka kutumia majukwaa
ya Siasa kuvuruga Amani yetu na Utulivu uliopo. Waepuke matamko ya vitisho na
kuhamasisha Wanachama wao kuendeleza vitendo vya uvunjifu wa amani na kujenga
chuki na uhasama miongoni mwa Jamii na kwa Serikali halali iliyopo
madarakani. Pamoja na kutofautiana kwa
mawazo na Sera za Vyama vya Siasa, ni muhimu tujenge mazingira ya kuvumiliana
kwa hali ya juu katika kujenga Demokrasia ya kweli hapa Nchini. Viongozi wa
Vyama wanatakiwa kueleza Sera zao badala ya kutukanana, kubezana, kushutumiana
na kuzomeana. Tujenge Nchi yetu kwa Amani na Utulivu ndipo tutapata maendeleo
endelevu.
13.
Mheshimiwa
Spika, tumeshuhudia
pia kuibuka kwa choko choko za Kidini. Baadhi ya Waumini wa Dini wamekuwa
wakikashifu Dini nyingine kwa kejeli na vitendo vingine visivyostahili. Aidha,
baadhi ya Viongozi wa Madhehebu ya Dini wamekuwa wakiwaingiza Waumini wao
katika Migogoro isiyoisha, ikiwa ni pamoja na kufungiana milango na kuzuia
Waumini Wasiabudu siku za Ibada. Napenda kusisitiza kuwa Madhehebu ya Dini yana
nafasi kubwa ya kujenga Umoja wa Kitaifa, Amani na mshikamano. Nawaomba
Viongozi wa Madhehebu ya Dini kutatua kwa amani migogoro iliyopo na kuelimisha
Waumini wao kuthamini, kujenga na kuenzi Amani na Utulivu uliopo Nchini.
Serikali imetoa uhuru wa Wananchi wake Kuabudu, kila mtu kwa Dini anayoitaka.
Hivyo, hakuna sababu ya Dini moja kukashifu Dini nyingine. Aidha, tupinge kwa
nguvu zetu zote choko choko za Kidini ambazo zimeanza kujitokeza katika sehemu
mbalimbali Nchini.
14.
Mheshimiwa
Spika, kwa
upande wa Mashirika Yasiyo ya Kiserikali baadhi yao yamekuwa yakihusishwa kuwa
mstari wa mbele katika kuwarubuni Wananchi kufanya vurugu zinazolenga kuleta
uvunjifu wa Amani. Napenda kusisitiza kuwa Mashirika Yasiyo ya Kiserikali yana
jukumu kubwa la kuelimisha Wananchi kuhusu umuhimu wa kujenga Umoja wa Kitaifa.
Viongozi wa Mashirika haya waepuke kutumiwa na baadhi ya Viongozi kujenga mbegu
mbaya kwa Wananchi kuvuruga Amani.
15.
Mheshimiwa
Spika, nigusie
pia Vyombo vya Habari, ambapo kumekuwa na kutiliana mashaka kwa baadhi ya
Vyombo hivyo kuandika habari za Uchochezi, hivyo kuashiria Uvunjifu wa Amani na
Mshikamano wa Kitaifa tuliojijengea. Vyombo vya Habari vina wajibu mkubwa wa
kuelimisha Umma na kuhabarisha kuhusu masuala mbalimbali ya maendeleo, kama
wafanyavyo wenzetu jirani, husan Vyombo vya Habari vya Nchi ya Rwanda. Aidha,
Vyombo hivi vina fursa nzuri ya kutumia uhuru uliopo kudumisha Amani na Utulivu
Nchini.
Tufanye
Nini
16.
Mheshimiwa
Spika, kutokana
na changamoto zilizopo za baadhi ya Watu waotaka kubomoa Umoja wa Taifa letu na
kuhatarisha Amani na Utulivu Nchini, sisi kama Taifa hatuna budi kufanya
yafuatayo:
i)
Serikali, Wananchi na Wadau wote ikiwemo
Vyama vya Siasa, Madhehebu ya Dini, Vyombo vya Habari, Mashirika Yasiyo ya Kiserikali,
n.k. tunapaswa tukae chini tuzungumze na kutafakari kuhusu hali hii;
ii)
Tunapaswa kwa namna zote tuvumiliane na
kuheshimiana kwa kuzingatia Utamaduni wa Kitanzania na Misingi ya Amani na
Utulivu tuliojijengea kwa muda mrefu; na
iii)
Wananchi wote tuzingatie na kuheshimu Utawala
Bora wa Sheria, Kanuni na Taratibu zilizopo.
17.
Mheshimiwa
Spika, napenda
kutumia fursa hii kuwaomba sana Wananchi na Watanzania wenzangu kuendeleza umoja na
mshikamano wa Kitaifa ili kudumisha Amani na Utulivu uliopo
Nchini. Ni vyema kutambua kuwa Amani
na Utulivu uliopo Nchini ni mazingira
wezeshi ya kusaidia kila mmoja wetu
kufanya shughuli zake za kijamii na kiuchumi na kujiletea maendeleo. Bila Amani na Utulivu hakuna maendeleo ya
Watu. Kwa upande wa Serikali itahakikisha kwamba, Umoja tuliojijengea
unadumishwa. Taasisi mbalimbali za Serikali, zikiwemo Vyombo vya Dola ni lazima
zihakikishe kwamba, Wananchi wanaishi kwa Amani na Utulivu. Vilevile,
kuhakikisha kuwa, Umoja wa Kitaifa tulioujenga kwa miaka mingi haupotei. Naziomba
Taasisi zote zinazohusika na kusimamia Amani na Usalama kuhakikisha kuwa,
pamoja na Changamoto zilizopo, Umoja wa Kitaifa unadumishwa.
HALI YA CHAKULA
NCHINI
i)
Hali ya
Mazao na Mvua
18.
Mheshimiwa Spika, tathmini iliyofanyika
hivi karibuni juu ya upatikanaji wa chakula Nchini na athari za mvua
zinazoendelea kunyesha, inaonesha kuwa maeneo mengi hasa, yale yanayopata mvua
za msimu kama vile Mbeya, Ruvuma, Rukwa, Iringa, Tabora, na Mtwara mazao mengi
yapo katika hatua mbalimbali za ukuaji. Inatarajiwa kwamba, endapo mvua hizi
zitaendelea vema, upatikanaji wa chakula katika maeneo hayo utakuwa mzuri.
19.
Mheshimiwa
Spika,
pamoja na hali hiyo ya hewa, tathmini ya kina ya hali ya chakula na lishe
iliyofanyika mwezi Januari 2013 inaonesha upungufu wa chakula katika Wilaya 47 zilizoko katika Mikoa 15 ambazo zitahitaji msaada wa chakula
katika vipindi tofauti. Inakadiriwa kuwa jumla ya Watu 1,615,445 watahitaji jumla ya Tani 32,870 za chakula.
ii) Hatua Zinazochukuliwa na Serikali
20.
Mheshimiwa
Spika,
kutokana na matarajio hayo ya uhaba wa Chakula, Serikali itahakikisha kuwa
Kitengo cha Hifadhi ya Taifa ya Chakula (NFRA) kinaendelea kusambaza mahindi
katika maeneo yenye uhaba wa chakula. Hadi sasa jumla ya Tani 20,000 zilishatolewa kwa Mikoa ya
Arusha, Kilimanjaro, Manyara, Dodoma, Singida, Morogoro, Lindi, Tanga, Mtwara,
Pwani, Dar es Salaam, Mwanza, Shinyanga, Simiyu, Mara na Tabora. Aidha, Kitengo
hicho (NFRA) kitaendelea kununua nafaka mapema baada ya mavuno ili kuhakikisha
kuwa Serikali ina hifadhi ya kutosha ya chakula kwa ajili ya kusambaza katika
maeneo yatakayokuwa na uhaba wa chakula. Hadi tarehe 6 Februari 2013 Ghala la
Taifa la Chakula lilikuwa na jumla ya Tani 68,712.9
za mahindi pamoja na Tani 3,335.989
za Mtama.
21.
Serikali itaendelea kufuatilia kwa karibu
hali ya upatikanaji wa chakula Nchini na kuhakikisha kuwa hakuna Mwananchi
atakayepoteza maisha kutokana na njaa. Nitoe wito kwa Wananchi kuendelea kuweka
utaratibu wa kuhifadhi sehemu ya mavuno yao baada ya kuvuna kwa ajili ya akiba
ya baadaye badala ya kuuza mavuno yao yote.
MAPAMBANO
DHIDI YA UGONJWA WA MALARIA NCHINI
i)
Hali
Halisi ya Ugonjwa wa Malaria Nchini
22.
Mheshimiwa
Spika, Nchi
yetu inayo changamoto kubwa ya kukabiliana na Magonjwa makubwa Duniani,
yakiwemo Malaria, Kifua Kikuu, UKIMWI, Saratani, n.k. Niruhusu leo katika
Hotuba yangu nizungumzie kidogo kuhusu Ugonjwa wa Malaria. Ugonjwa wa Malaria
bado unaongoza kuwa sababu kubwa za Wagonjwa wengi wanaohudhuria katika Vituo
vya huduma za Afya Nchini. Aidha, ugonjwa huu unaongoza kwa kusababisha vifo,
hasa kwa Watoto walio chini ya umri wa miaka Mitano. Takwimu kutoka Vituo vya
kutolea huduma ya Afya Nchini zinaonesha kuwa, takriban Wagonjwa Milioni 11 hadi 12 huhudhuria katika Vituo vya huduma za Afya kwa sababu ya
ugonjwa wa Malaria. Vilevile, tafiti zilizofanyika katika Jamii [Tanzania HIV/Malaria Indicator Survey
(THMIS) 2011/2012] zinaonesha kuwa Asilimia
10 ya Watoto katika Kaya wana maambukizi ya vimelea vya ugonjwa wa Malaria.
ii) Jitihada za Serikali katika kumaliza
tatizo la Malaria Nchini
23.
Mheshimiwa Spika, ili kukabiliana na tatizo hili katika kuhakikisha Wananchi wanaendelea
kujikinga na maambukizi dhidi ya ugonjwa wa Malaria, Serikali imefanya mambo
muhimu yafuatayo:
Moja: Kutekeleza Mpango Mkakati wa Taifa wa
Mapambano Dhidi ya Ugonjwa wa Malaria wa Miaka Mitano (2008-2013) ambao una
lengo la kupunguza vifo kwa Asilimia 80 ifikapo mwaka 2013 mwishoni.
Utekelezaji wa Mpango huu unafanyika kwa kushirikiana na Mikoa, Wilaya na Wadau
mbalimbali hadi katika ngazi ya Jamii;
Pili: Kusambaza na kuongeza matumizi ya vyandarua vyenye
viuatilifu vya muda mrefu katika Kaya. Hadi sasa zaidi ya vyandarua Milioni
26 vimesambazwa kupitia Kampeni iliyolenga Watoto wenye umri chini ya miaka
Mitano;
Tatu: Kutekeleza Mpango wa Hati Punguzo unaolenga kuhakikisha Akina
Mama Wajawazito na Watoto wanaozaliwa wanaendelea kupata vyandarua hivyo na
kujikinga dhidi ya ugonjwa wa Malaria;
Nne: Kuendeleza Mpango wa kunyunyizia dawa ya ukoko majumbani ili
kutokomeza mazalia ya Mbu. Mpango huo unaendelea kutekelezwa katika Mikoa ya
Kagera, Mwanza na Mara ambapo zaidi ya Kaya 1,440,000 sawa na Asilimia
90 katika Wilaya za Mikoa hiyo zitanyunyiziwa viuatilifu. Kutokana na
Mpango huo, zaidi ya Watu 6,500,000 wameendelea kukingwa dhidi ya
maambukizi ya ugonjwa wa Malaria;
Tano: Kuendeleza Mpango wa kuangamiza viluwiluwi vya Mbu kwa kutumia
njia za Kibaiolojia. Mpango huu ambao unafanywa na Serikali kwa ushirikiano na
Serikali ya Nchi ya Cuba unatekelezwa katika Jiji la Dar es Salaam kuanzia
mwaka 2011;
Sita: Kutumia Mwongozo wa kutibu ugonjwa wa Malaria isiyo kali
kwa kutumia Dawa ya Mseto ya Artemether/Lumefantrine
(ALu). Mwongozo huu unaendelea kutumika katika Vituo vyote vya Umma vya
kutolea huduma za Afya; na
Saba: Kusambaza kipimo cha haraka cha kutambua na kuthibitisha uwepo
wa vimelea vya Malaria kwenye damu katika Vituo vyote vya Umma vya kutoa huduma
za afya Nchini.
iii) Changamoto
24.
Mheshimiwa Spika, pamoja na mafanikio hayo makubwa yaliyopatikana, bado kuna changamoto
ambazo zinahitaji kufanyiwa kazi. Changamoto hizo ni pamoja na:
Moja: Kujitokeza kwa usugu wa mbu
dhidi ya viuatilifu vya aina ya “pyrethroids”
vinavyotumika katika vyandarua na unyuziaji dawa ya ukoko majumbani;
Pili: Kupata vyanzo zaidi vya
fedha za ndani za kuendeleza mkakati wa unyunyiziaji dawa ya ukoko majumbani;
Tatu: Uwezo mdogo wa uzalishaji wa
dawa za kuangamiza viluwiluwi vya Mbu na kuanza kuangamiza Viluwiluwi hivyo
katika Jiji la Dar es Salaam; na
Nne: Kuendeleza uhamasishaji
Wananchi kutumia nyenzo na kushiriki katika mikakati iliyopo, hasa inayohitaji
ushiriki wao wa moja kwa moja, kama kuharibu mazalia ya Mbu.
iv) Matarajio ya Mkutano wa United Against Malaria – Afrika Kusini
25.
Mheshimiwa
Spika, katika
juhudi za kupambana na Malaria Duniani, Shirika la Roll Back Malaria Partnership wakishirikiana na Wizara ya Afya ya
Afrika Kusini wanatarajia kufanya Mkutano mkubwa unaohusu mapambano dhidi ya
Malaria kwa Nchi za Jumuiya ya Maendeleo Kusini mwa Afrika (SADC) kuanzia
tarehe 9 - 11 Februari, 2013. Mkutano huo unatarajia kukutanisha Viongozi wa
ngazi ya juu kutoka Nchi za SADC ikiwa ni pamoja na baadhi
ya Marais, Mawaziri Wakuu, Mawaziri wa Afya na
Mawaziri wa Michezo katika Nchi hizo.
Mkutano huo pia utajumuisha Viongozi wa juu wa Makampuni mbalimbali ya Sekta
Binafsi.
26.
Mheshimiwa
Spika,
lengo la Mkutano huo ni kukutanisha Viongozi mbalimbali kwa lengo la kuendesha
mjadala kuhusu janga la Malaria katika Nchi za Afrika; ikizingatiwa kuwa
ufadhili wa utekelezaji wa mikakati mbalimbali unazidi kupungua. Mkutano huo
unategemewa kuwa chachu kwa Viongozi kuongeza Bajeti za udhibiti wa Malaria
Nchini mwao na kuongeza ushirikiano na Sekta Binafsi pamoja na Sekta ya
Michezo, hususan katika Mpira wa Miguu katika
dhana nzima ya Mpango wa “Safe Companies”. Aidha, Mkutano huo unatarajiwa kuongeza
kasi ya Kupambana dhidi ya ugonjwa wa Malaria katika Nchi hizo.
27.
Ni matumaini yangu kuwa, Mkutano huo utakuwa
wa mafanikio makubwa kwa Nchi za Kusini mwa Afrika katika vita dhidi ya ugonjwa
wa Malaria. Vilevile, utatupatia uzoefu kwa Nchi yetu katika kupambana na
Ugonjwa huu wa Malaria.
v) Jitihada za Chama cha Wabunge cha
Kupambana na Malaria
28.
Mheshimiwa
Spika, katika
jitihada za kupambana na Malaria Nchini, Muungano
wa Wabunge wa Bunge la Jamhuri ya Muungano ya Tanzania walianzisha Asasi
inayojulikana kama Tanzania Parliamentary
Against Malaria (TAPAMA). Lengo la kuanzishwa kwa Asasi hii ni kuongeza
utashi wa Kisiasa katika kushiriki na kutekeleza Mpango na Sera ya Taifa ya kutokomeza Ugonjwa
wa Malaria Nchini. Asasi hii ilisajiliwa mwaka 2008 na hadi sasa imetekeleza
masuala mbalimbali katika jitihada zake za kupambana na Malaria Nchini kama
ifuatavyo:
Moja: Ugawaji wa Vyandarua kwa Watoto
wanaoishi katika mazingira magumu na hatarishi kwa Mikoa ya Ruvuma, Kilimanjaro
na Mwanza ambapo zaidi ya Watoto 2,500
walifaidika na huduma hii;
Pili: Kufanya mazungumzo na Wawakilishi wa
Bunge la Jumuiya ya Ulaya mwaka 2009 waliotembelea Tanzania na kuona uwezekano
wa Jumuiya ya Ulaya kusaidia zaidi Mapambano dhidi ya Malaria Tanzania. Aidha,
walifanya mazungumzo na Viongozi na Wawakilishi wa Asasi ya Malaria
No More ya Marekani, ambao waliongozwa na Balozi Mark Green na kuwezesha kuanza kwa Mradi wa Zinduka, Malaria Haikubaliki;
Tatu: Kushiriki Kikao cha Nchi za Jumuiya ya Ulaya Nchini
Ufaransa mwaka 2009 ili kujadili juhudi za Viongozi wa Kisiasa katika
Kupamabana na Malaria Nchini;
Nne: Kushiriki kutayarisha Mwongozo (Advocacy Guideline) utakaotumiwa na
Wabunge, Madiwani na Viongozi wengine wa Kisiasa na Kijamii katika Utekelezaji
na ushawishi wao katika kutokomeza Malaria Tanzania.
29.
Mheshimiwa
Spika, nachukua
fursa hii kuwapongeza Wajumbe wote wa TAPAMA chini ya Uongozi wa Mheshimiwa
Riziki Said Lulida, Mbunge wa Viti Maalum kwa juhudi zao za kuhakikisha kuwa
wanaungana na Wadau wengine Nchini na Duniani katika kutokomeza ugonjwa wa
Malaria. Nazipongeza pia Taasisi Zisizo za Kiserikali kwa ujumla wao ambazo
zimejitokeza katika Mapambano dhidi ya Magonjwa mbalimbali, yakiwemo UKIMWI,
Kifua Kikuu, Saratani, n.k. Tunawaomba Waheshimiwa Wabunge zaidi wazidi kujiunga
na Asasi hizi na hasa za Magonwa ili kuweka hamasa kwa Wananchi katika
Kupambana na Maradhi hayo. Aidha, natoa wito kwa Wananchi wote kwa ujumla
kuunganisha nguvu za Kupambana na Ugonjwa huu wa Malaria ili kunusuru nguvukazi
ya Watanzania. Suala kubwa ni kuzingatia masharti ya Wataalam kuanzia katika
kutunza mazingira yetu na kutumia Vyandarua kama kinga iliyo ya uhakika.
LISHE
30.
Mheshimiwa
Spika,
wakati nikitoa hoja ya kuahirisha Mkutano wa Tisa wa Bunge, mwezi Novemba, 2012 nilieleza
kwa kifupi utekelezaji wa Mkakati wa Taifa wa
Lishe wa Mwaka 2011/2012 – 2015/2016. Pamoja na mambo mengine nilionesha hatua
ambazo Serikali inachukua kuondokana na tatizo
la Lishe Nchini. Jambo kubwa na la msingi katika kupambana na
tatizo la Lishe ni kutoa elimu kwa Jamii ili kula vyakula vyenye Virutubisho
muhimu hasa kwa Mama Wajawazito na Watoto Wachanga. Jitihada za Serikali za
kuwashirikisha Wadau mbalimbali katika kutoa Elimu ya Lishe Nchini zimeleta
mwamko mzuri ambapo Wadau mbalimbali wakiwemo Mamlaka za Serikali za Mitaa,
Mashirika Yasiyo ya Kiserikali na Wadau wa Maendeleo sasa wanashiriki kikamilifu
katika utoaji elimu na kukuza kilimo cha mazao yenye virutubisho muhimu ili
kuongeza vyakula vyenye virutubisho.
31.
Mheshimiwa Spika, katika kuunga mkono
jitihada za Serikali za kupambana na tatizo la Lishe Nchini, hivi karibuni
Waheshimiwa Wabunge chini ya Uenyekiti wa Mheshimiwa Lediana Mafuru Mng’ong’o
Mbunge wa Viti Maalum wameunda Kikundi cha kuongeza hamasa na kuzidisha chachu
ya kutoa elimu kuhusu Lishe Bora hapa Nchini. Nimearifiwa kwamba, Kikundi hicho
cha Wabunge kimekutana tarehe 10 hadi 12 Januari, 2013 na kukubaliana kuhusu
kazi ambazo watafanya ili kuongeza sauti yao kwenye jamii juu ya umuhimu wa
Lishe Bora. Kikundi pia kimeandaa Mpango
Mkakati wa Miaka Mitatu (2013-2015) wenye malengo ya kukuza uelewa wa Umma juu
ya Lishe, Chakula na Haki za Watoto. Aidha, kikundi hicho kiliazimia kushawishi
uwekaji wa vipaumbele vya Lishe katika Mipango ya Maendeleo na Bajeti za
Wizara, Mikoa na Mamlaka za Serikali za Mitaa na kuingiza masuala ya Lishe,
Chakula na Haki za Watoto katika Sera na Mikakati mbalimbali ya Serikali.
Azimio lingine ni kuimarisha usimamizi wa kazi za Bunge kuhusu Lishe, Chakula
na Haki za Watoto.
32.
Mheshimiwa Spika, napenda kuchukua
fursa hii kukishukuru kwa dhati kikundi hiki ambacho kimeona umuhimu wa kuunga
mkono juhudi za Serikali za kupambana na tatizo la Lishe, ikiwemo Utapiamlo. Nitumie
fursa hii kuwashukuru Waheshimiwa Wabunge kwa kuanzisha kikundi hiki.
Niwashukuru kwa kuona umuhimu wa kusimamia tatizo hilo ili kupata suluhu ya
kudumu. Ninatambua pia umuhimu wa Waheshimiwa Wabunge kuhamasisha masuala ya
Lishe kwa Wananchi wa Majimbo yao. Niwaombe Waheshimiwa Wabunge wengine wote
kushiriki kutoa msukumo wa pekee kwa Wananchi wa Majimbo yenu katika Mapambano
dhidi ya Utapiamlo ili kwa pamoja tujenge Taifa lenye Watu walio na Lishe Bora.
Lengo ni kuwawezesha kuchangia zaidi katika uzalishaji mali na ukuaji wa uchumi
wa Nchi kwa ujumla.
MCHAKATO KUELEKEA
KATIBA MPYA
33.
Mheshimiwa
Spika, Waheshimiwa
Wabunge watakumbuka kuwa, Tume ya Mabadiliko ya Katiba imetangaza kumaliza kazi
ya kukusanya maoni binafsi ya Wananchi mmoja mmoja kama mchango wao kwa ajili
ya kuandika Katiba Mpya. Aidha, imekamilisha kazi ya kukutana na Makundi Maalum,
Viongozi wa Kitaifa Wastaafu na Viongozi wa Kitaifa waliopo Madarakani. Kwa
maana hiyo, Tume sasa imekamilisha kazi ya ukusanyaji maoni kama ilivyopangwa.
Hivi sasa Tume inaendelea na kazi za uchambuzi wa maoni yaliyotolewa na
Wananchi na yale yaliyotolewa na Makundi Maalum ili baadaye kutayarisha
Rasimu ya Katiba ambayo itawasilishwa
katika Mabaraza ya Katiba
yatakayoitishwa na Tume Nchini kote.
34.
Kulingana na Ratiba, Mikutano ya Mabaraza ya
Katiba itafanyika kuanzia mwezi Juni, 2013 na itajumuisha Wajumbe
watakaochaguliwa na Wananchi wenyewe kuanzia ngazi ya Kijiji. Wajumbe hao ndio watapaswa
kuwasilisha maoni ya Wananchi katika Mikutano ya Mabaraza.
35.
Mheshimiwa
Spika,
nimearifiwa kuwa Tume imeandaa Rasimu ya Mwongozo wa namna bora na ya
Kidemokrasia ya kuwapata Wajumbe wa Mabaraza ya Katiba ambao unaendelea
kusambazwa Nchi nzima. Mwogozo huo tayari umetangazwa katika Vyombo vya Habari
ili Wananchi waufahamu na kutoa maoni kuhusu namna ya kuuboresha.
36.
Mheshimiwa
Spika, kwa
mujibu wa Rasimu hiyo ya Mwongozo, katika Mikoa ya Tanzania Bara ukiondoa Mkoa
wa Dar es Salaam, kila Kata itawakilishwa na Wajumbe wanne (4) watakaochaguliwa
kutoka miongoni mwa Wakazi wa Vijiji vilivyopo kwenye Kata ambao wataungana na
Madiwani wa Kata na Madiwani wa Viti Maalum kuunda Baraza la Katiba la Wilaya.
Kwa Mkoa wa Dar es Salaam, Tume imeandaa utaratibu tofauti wa kuwapata Wajumbe
wa Mabaraza ya Katiba ya Wilaya ambapo kila Kata watatoka Wajumbe wanane (8)
ambao wataungana na Madiwani wa Kata na Madiwani wa Viti Maalum. Kwa msingi huo, kutakuwa na jumla ya Wajumbe 18,169 watakaohudhuria Mabaraza ya
Katiba ya Wilaya Kwa Tanzania Bara.
37.
Mheshimiwa
Spika,
kwa upande wa Zanzibar, kutakuwa na Mabaraza ya Katiba ya Wilaya Ngazi ya
Mamlaka ya Serikali za Mitaa 13. Kila
Shehia itawakilishwa na Wajumbe watatu (3), ambao wataungana na Madiwani wa
Wadi, Madiwani wa Viti Maalum na Madiwani wa kuteuliwa waliopo kazini kwa sasa.
Kwa msingi huo, Wajumbe wote wa Mabaraza ya Katiba kwa Zanzibar watakuwa 1,198.
38.
Wananchi wanaopenda kuwa Wajumbe wa Mabaraza
ya Katiba ya Wilaya watatakiwa kuwasilisha majina yao kwa Maafisa Watendaji wa Vijiji na Mitaa kwa Tanzania Bara na kwa
upande wa Tanzania Zanzibar watawasilisha kwa Sheha kwa tarehe itakayoelekezwa
na Tume ya Mabadiliko ya Katiba hapo baadaye.
39.
Mheshimiwa
Spika, napenda
kutoa wito kwa Viongozi wote katika ngazi za Wilaya na Serikali za Mitaa
kusimamia kikamilifu utaratibu ambao umewekwa na Tume. Kwa kufanya hivyo,
Wajumbe ambao watashiriki katika Mabaraza ya Katiba watapatikana kwa njia
za Kidemokrasia na hivyo, kufanikisha
Vikao vya Mabaraza ya Katiba. Ni matumaini yangu kuwa Wananchi watausoma
Mwongozo huo, na baadaye kuwasilisha mapendekezo na maoni yao kwa Tume kabla ya
kazi ya uchaguzi wa Wajumbe wa Mabaraza ya Katiba kuanza rasmi.
40.
Nitumie fursa hii kuwaomba Wananchi wote
kushiriki kikamilifu kutoa maoni kuhusu Mwongozo huo na pia katika kuwapata
Wajumbe watakaoshiriki katika Mabaraza ya Katiba kwa mujibu wa Sheria, na
vilevile Wajumbe hao washiriki kikamilifu katika Vikao vya Mabaraza ya Katiba
na kutoa maoni kwenye Rasimu ya Katiba.
RIPOTI YA
TATHMINI YA UTAWALA BORA AFRIKA (APRM)
41.
Mheshimiwa Spika, katika kuendeleza
dhamira ya uwazi na ujenzi wa pamoja wa utawala bora nchini kwa kuwashirikisha
Wananchi, Nchi yetu imekuwa miongoni mwa Nchi 33 za Umoja wa Afrika zilizoamua
kwa hiari yake kujiunga na Mpango wa Bara la Afrika wa Kujitathmini Kiutawala
Bora (The African Peer Review Mechanism -
APRM). Tanzania ilijiunga na mchakato huo mwaka 2004, na Bunge liliuridhia mwaka 2005.
42.
Mheshimiwa Spika, Mpango huu wa
kujithamini Kiutawala Bora ni muhimu kwetu na unaakisi Sera zetu na za Waasisi
wa Taifa hili juu ya Kujikosoa na Kujisahihisha. Aidha, unahusisha Viongozi wa
Afrika na unatoa fursa kwa Wananchi kutathmini hali ya Utawala Bora katika Nchi
zao na kuainisha kwa pamoja mambo mazuri yanayopaswa kuendelezwa na yale yenye
changamoto za kufanyiwa kazi. Miongoni mwa sababu za Nchi yetu kujiunga na
Mpango huu ni kutokana na ukweli kwamba Watanzania tuna mengi ya kuifundisha
Afrika na Watu wake kuhusu Utawala Bora na sisi pia kujifunza kutoka kwa
wenzetu.
43.
Mheshimiwa
Spika,
ninayo furaha kulifahamisha Bunge lako Tukufu kuwa baada ya zoezi la muda mrefu
la kukusanya maoni Nchi nzima kuhusu Mpango huu ambapo Waheshimiwa Wabunge nao
walishiriki kutoa maoni yao kuhusu Utawala Bora, sasa hivi Nchi yetu, imefikia
hatua muhimu katika Mchakato huo wa kujitathmini kiutawala bora.
44.
Tarehe 26 Januari 2013, Ripoti ya Hali ya
Utawala Bora hapa nchini iliwasilishwa mbele ya Wakuu wa Nchi za APRM Addis
Ababa, Ethiopia ambapo Mheshimiwa Dkt. Jakaya Mrisho Kikwete, Rais wetu alipata
fursa ya kuzungumzia mwelekeo wa Nchi yetu katika kujenga Taifa imara zaidi
katika kipindi cha miaka 50 ijayo.
45.
Mheshimiwa
Spika,
katika Ripoti hiyo ambayo itatumika kama rejea, zimeainishwa juhudi zetu kubwa
za kulinda amani Nchini. Pamoja na kuimarisha Utawala Bora wa Sheria na Haki za
Binadamu. Aidha, kupitia Ripoti hiyo, wenzetu katika masuala ya kuendesha
Utawala Bora, Barani Afrika na Duniani kwa ujumla wametambua jitihada zetu
pamoja na mambo mengine katika kuulinda Muungano, kuimarishwa kwa mapambano
dhidi ya Rushwa na zaidi ya yote wamejua sura ya Tanzania katika ukombozi na
utetezi wa amani Afrika ambao Nchi yetu imepongezwa sana kwa juhudi zake.
46.
Ripoti
hiyo pia imeainisha changamoto ambazo wenzetu wa Afrika wanadhani tunapaswa
kuzifanyia kazi zaidi. Changamoto hizo ni pamoja na suala la kushughulikia Kero
za Muungano, kuimarisha zaidi juhudi za kuondoa umaskini na kuilinda amani ya
Nchi yetu hasa kutokana na chokochoko za Kidini zilizoanza kujitokeza. Tumeaswa
kuutumia vyema mchakato wa sasa wa Mabadiliko ya Katiba kuijenga Tanzania bora
zaidi katika miaka 50 ijayo.
47.
Mheshimiwa
Spika, kuwasilishwa
kwa Ripoti hiyo ya APRM kwa Wakuu wa Nchi wa Mpango huu ndio mwanzo sasa wa
Serikali yetu ya kuimarisha maeneo yaliyoonekana kuwa tunafanya vyema. Pia
hatua hiyo inatoa fursa ya kuanza kutekeleza Mpangokazi wa Miaka Mitano ambao
umeainisha namna gani ya kuyafanyia kazi maeneo ambayo wananchi waliyaona kuwa
yanapaswa kufanyiwa kazi zaidi. Suala hili liliwekewa msisitizo na Mheshimiwa
Rais katika Hotuba yake ya Mwisho wa Mwezi Januari 2013 aliyoitoa kwa Taifa.
48.
Mheshimiwa
Spika, kutokana
na manufaa ya APRM kama daraja kati ya Serikali na Wananchi wa kutatua matatizo
yetu kwa pamoja, Serikali itaendelea kuiimarisha Taasisi ya APRM hapa Nchini
ili iweze kuwa kitovu chetu cha fikra (think
tank) katika kushauri kuhusu masuala ya Utawala Bora Nchini. Vilevile,
kuiwezesha Taasisi hii kuendelea kuwa kiungo kati ya Serikali yetu na Wananchi
wake katika kutathmini na kutupatia mrejesho juu ya mipango na Sera zetu za
maendeleo.
49.
Aidha, Serikali itaendelea kufadhili shughuli
za APRM, kuiimarisha Taasisi kwa raslimali watu na fedha kwa ajili ya kazi pana
zaidi za kutoa ushauri, kuunganisha Wadau mbalimbali na kuendelea kuratibu
tathmini nyingine katika siku zijazo kwa lengo la kujipa nafasi ya kujikosoa
ili kujisahihisha. Napenda kuwashukuru Wajumbe wa Kamati ya Mambo ya Nje,
Ulinzi na Usalama wakishirikiana na Sekretariati ya APRM Tanzania kwa kazi
nzuri waliyoifanya ambayo imetuwezesha kufikia mafanikio hayo.
UANZISHAJI
WA MAENEO MAPYA YA UTAWALA
i)
Uanzishaji
wa Mikoa na Wilaya
50.
Mheshimiwa
Spika,
Waheshimiwa Wabunge watakumbuka kuwa, mwezi Machi 2012, Mheshimiwa Rais
aliridhia kuanzisha Mikoa Mipya Minne (4) na Wilaya 19. Napenda kulijulisha
Bunge lako Tukufu kwamba, Serikali sasa imekamilisha mchakato wa kuanzisha
maeneo hayo Mapya ya Utawala, kwa kuanzisha Mikoa Minne ya Geita, Simiyu,
Njombe na Katavi. Aidha, imekamilisha uanzishwaji wa Wilaya 19 za Buhigwe,
Busega, Butiama, Chemba, Gairo, Ikungi, Itilima, Kakonko, Kalambo, Kaliua,
Kyerwa, Mbogwe, Mkalama, Mlele, Momba, Nyang’wale, Nyasa, Uvinza na
Wanging’ombe. Mikoa na Wilaya hizo tayari zimeshaanza kufanya kazi na kutoa
huduma mbalimbali kwa Wananchi. Vilevile, Mheshimiwa Rais alishafanya Uteuzi wa
Viongozi Wakuu wa Mikoa na Wilaya Mpya. Serikali imeendelea kupeleka Watumishi
na kuanza kujenga miundombinu muhimu katika maeneo husika. Hata hivyo, pamoja
na dhamira njema ya Serikali ya kuanzisha maeneo hayo, bado zipo changamoto nyingi,
ikiwemo kupata Watumishi wa kutosha ambazo Serikali inaendelea kuzitatua.
ii)
Uanzishaji
wa Halmashauri
51.
Mheshimiwa
Spika, ili
kupeleka huduma karibu zaidi kwa Wananchi, Serikali pia iliazimia kuanzisha
Halmashauri Mpya 37. Uanzishaji wa Halmashauri hizo unaendelea na upo katika
hatua mbalimbali kwa kuzingatia makundi yafuatayo:
Kundi
la Kwanza,
linahusu Halmashauri Mpya 8 za Manispaa, Miji na Jiji pamoja na Halmashauri
Moja (1) ya Wilaya ambazo mchakato wa uanzishaji wake tayari umekamilika
Kisheria na zimeanza kufanya kazi. Kundi hili linajumuisha Halmashauri za Jiji
la Arusha, Manispaa ya Ilemela, Manispaa ya Lindi, Halmashauri ya Mji wa
Kahama, Halmashauri ya Mji wa Masasi, Halmashauri ya Mji wa Makambako, Halmashauri
ya Mji wa Geita, Halmashauri ya Mji wa Bariadi na Halmashauri ya Wilaya ya
Busokelo. Halmashauri hizo tayari
zimepata Hati na kupangiwa Wakurugenzi.
Kundi la Pili,
linajumuisha Halmashauri Kumi (10) ambazo mchakato wa kuzianzisha umekamilika
na tayari zimetangazwa katika Gazeti la Serikali la tarehe 23 Novemba 2012. Halmashauri
hizo ni Kalambo, Nsimbo, Mlele, Bumbuli, Ushetu, Msalala, Mbogwe, Busega, Momba
na Kyerwa. Halmashauri hizo kwa sasa zinaandaliwa Hati ili zianze.
Kundi
la Tatu,
ni Halmashauri za Wilaya Kumi (10) ambazo mchakato wa uhakiki wake umekamilika
na Amri za Uanzishaji zimeshasainiwa na wakati wowote zitatangazwa katika
Gazeti la Serikali. Kundi hili linajumuisha Halmashauri za Wilaya za Buhigwe,
Kaliua, Nyang’hwale, Wanging’ombe, Chemba, Mkalama, Gairo, Nyasa, Itilima na Kakonko.
Aidha, zipo Halmashauri nyingine Nne (4) katika kundi hili ambazo Amri zake
zinakamilishwa na hatimaye zitasainiwa hivi karibuni. Halmashauri hizo ni Butiama,
Tarime, Uvinza na Ikungi.
Kundi
la Nne,
linajumuisha Halmashauri Nne ambazo Mchakato wa uanzishaji wake umekamilika
isipokuwa taratibu za Kisheria haziwezi kuanza kwa sababu baadhi ya Kata katika
Halmashauri hizo ni mpya, hivyo hakuna Madiwani. Halmashauri hizo Nne (4) ni za
Miji ya Kasulu, Handeni, Tunduma na Nzega. Mathalani,
katika Halmashauri ya Mji wa Kasulu kuna Kata 14, na kati ya hizo, Kata 6 ni
mpya na hazina Madiwani. Kwa upande wa Halmashauri ya Mji wa Handeni
ina jumla ya Kata 12, kati ya hizo 9 ni mpya na hazina
Madiwani. Aidha, Halmashauri ya Mji wa Tunduma ina Kata 5 mpya na zote hazina
Madiwani na Halmashauri ya Mji wa Nzega ina Kata 10, na kati ya hizo Kata 3 ni
mpya na hazina Madiwani.
52.
Mheshimiwa
Spika, lengo
la kuanzisha maeneo hayo mapya ni kuwawezesha Wananchi kupata huduma karibu
zaidi kwa Wananchi. Nitoe wito kwa Wakuu wa Mikoa, Wilaya na Watendaji wote
kuwaongoza Wananchi kutumia fursa hiyo ya kuanzishwa kwa maeneo hayo katika
kujiletea maendeleo. Serikali itaendelea kupeleka huduma zaidi karibu na
Wananchi ili kuongeza kasi ya maendeleo katika maeneo hayo. Aidha, Serikali
itaweka utaratibu wa kuzipatia Halmashauri zinazoanzishwa Watumishi hatua kwa
hatua.
HATUA ZILIZOCHUKULIWA NA SERIKALI DHIDI YA
WATANZANIA WALIOFICHA FEDHA HARAMU NJE YA NCHI
53.
Mheshimiwa
Spika, tarehe
9 Novemba, 2012, Bunge lilipitisha Azimio Na. 9/2012 kuhusu kuitaka Serikali
kuchukua hatua dhidi ya Watanzania walioficha fedha haramu nje ya Nchi kufuatia
Hoja Binafsi iliyowasilishwa na Mheshimiwa Zitto Kabwe (Mb). Azimio hilo
linahitaji, pamoja na mambo mengine, Serikali iwasiliane na Benki ya Dunia
kupitia Kitengo cha Asset Recovery Unit
ili mabilioni yanayomilikiwa na Watanzania katika Mabenki nje ya Nchi ambapo
hufichwa kwa kukwepa kulipa kodi yarudishwe na kwamba Watanzania wote wenye
akaunti za fedha nje ya Nchi waeleze wamezipataje ili TAKUKURU wachukue hatua za
Kisheria dhidi ya watu wote wenye kumiliki fedha na mali kinyume na mapato yao
halali. Aidha, iliazimiwa na Bunge na Serikali ikakubali kwamba, katika Mkutano
wa Bunge wa 11 italeta Taarifa ya hatua iliyochukuliwa ili kuziba mianya ya
utoroshaji wa fedha nje ya Nchi.
54.
Mheshimiwa
Spika, tarehe
31 Desemba, 2012, Mheshimiwa Rais aliridhia kuundwa kwa Kamati Maalum ya
Kitaifa kushughulia hoja hiyo ya kuitaka Serikali kuchukua hatua dhidi ya Watanzania
walioficha fedha haramu nje ya Nchi. Kamati hiyo inaundwa na Wajumbe wanane
wanaotoka katika Taasisi za Kitengo cha Kudhibiti Fedha Haramu; Taasisi ya
Kuzuia na Kupambana na Rushwa; Jeshi la Polisi; Benki Kuu ya Tanzania; Usalama
wa Taifa na Ofisi ya Mwanasheria Mkuu wa Serikali. Kazi za Kamati hiyo ni:
(i)
Kuchunguza na kubaini majina ya Watanzania
wanaodaiwa kuficha fedha nje ya Nchi kinyume na Sheria na Kanuni za Nchi;
(ii)
Kuchunguza iwapo fedha hizo ni haramu au la;
(iii)
Kutambua Mabenki na Nchi zilizofichwa fedha
hizo;
(iv)
Kuandaa mashtaka dhidi ya Watanzania
watakaobainika kuficha fedha haramu nje ya Nchi; na
(v)
Kuishauri Serikali jinsi ya kuzuia uhalifu wa
makosa ya fedha.
55.
Mheshimiwa
Spika, Kamati
hii imeanza kazi zake rasmi tarehe 9 Januari 2013 kwa kupanga namna ya
kutekeleza kazi zake ikiwemo kukusanya taarifa kuhusu Watanzania wanaodaiwa
kutorosha fedha haramu nje ya Nchi na kuangalia namna ya kupata taarifa muhimu
nje ya Nchi. Kamati hiyo inaratibiwa na Mwanasheria Mkuu wa Serikali.
56.
Ili kuiwezesha Kamati hii kufanya kazi yake
kwa ufanisi ni wazi kwamba itahitaji kupata ushirikiano mkubwa kutoka kwa
Wananchi kwa kutoa taarifa mbalimbali kuhusu suala hili. Hivyo, natoa wito kwa
Wananchi wote wenye taarifa sahihi na za ukweli zinazoweza kuisadia Kamati kutekeleza
kazi hii wanahimizwa wajitokeze kutoa maoni yao kupitia Ofisi ya Mwanasheria
Mkuu wa Serikali na kushirikiana kwa karibu na Kamati iliyoundwa na Serikali.
Aidha, nawaomba Waheshimiwa Wabunge nao kutoa ushirikiano wa kufanikisha kazi
za Kamati hii.
HITIMISHO
57.
Mheshimiwa
Spika,
kwa kumalizia napenda niwashukuru wote waliofanikisha Mkutano huu wa Kumi wa
Bunge. Kipekee nikushukuru wewe binafsi Mheshimiwa Spika kwa kutuongoza vizuri ndani
ya Bunge lako Tukufu. Nimshukuru vilevile, Naibu Spika na Wenyeviti wa Bunge
kwa kuendesha Vikao vya Bunge kwa ufanisi. Aidha, niwashukuru Waheshimiwa
Wabunge kwa michango yenu. Nimshukuru Katibu wa Bunge na Wasaidizi wake kwa
huduma nzuri walizozitoa wakati wote tukiwa hapa. Niwashukuru Watendaji wa Serikali na Taasisi mbalimbali kwa kutekeleza
majukumu yao vizuri ili kufanikisha shughuli za Bunge zilizopangwa. Niwashukuru
Waandishi wa Vyombo vya Habari kwa kutufikishia habari kwa Wananchi yale
yaliyojiri hapa Bungeni na kwa wakati. Vilevile, navishukuru Vyombo vya Ulinzi
na Usalama kwa kazi yao nzuri na Madereva wote kwa huduma zao kwa Washiriki wa
Bunge hili.
58.
Mheshimiwa
Spika,
baada ya kusema hayo, naomba niwatakie Safari Njema na sasa natoa hoja kwamba
Bunge lako Tukufu liahirishwe hadi Siku ya Jumanne tarehe 9 Aprili, 2013 Saa 3:00 Asubuhi kwenye Ukumbi huu hapa Dodoma.
59.
Mheshimiwa
Spika,
naomba kutoa hoja.
No comments:
Post a Comment