Spika wa Bunge kikao cha kamati ya Uongozi kujadili ratiba ya maandalizi ya mazishi ya Mhe. Regia Mtema

Spika wa Bunge Mhe. Anne Makinda (Mb) akiongoza kikao cha kamati ya Uongozi kujadili ratiba ya maandalizi ya mazishi ya Mhe. Regia Mtema katika ofisi za Bunge jana. walioko kulia ni Naibu Spika Mhe. Job Ndugai (Mb), Kiongozi wa Kambi ya Upinzani Bungeni Mhe. Freeman Mbowe (Mb) na Waziri wa Nchi Ofisi ya Waziri Mkuu, Sera, Uratibu na Bunge Mhe.William Lukuvi.

Spika wa Bunge Mhe. Anne Makinda (Mb) akiongoza kikao cha kamati ya Uongozi kujadili ratiba ya maandalizi ya mazishi ya Mhe. Regia Mtema katika ofisi za Bunge jana.

Kiongozi wa Kambi ya Upinzani Bungeni Mhe. Freeman Mbowe akifafanua jambo wakati wa kikao cha kamati ya uongozi kilichokaa jana chini ya uenyekiti wa Mhe. Spika kujadili ratiba ya maandalizi ya mazishi ya Mhe. Regia Mtema katika ofisi za Bunge. Kulia ni Mhe. Zaituni Buyogela (Mb) na Mhe. Maua Daftrari. mwenye suti kushoto ni Mhe. William Lukuvi. Picha na Owen Mwandumbya wa Bunge.

TAARIFA KWA VYOMBO VYA HABARI 

YAH: MAANDALIZI YA KUAGA MWILI WA MAREHEMU

MHE. REGIA ESTELATUS MTEMA, (MB), TAREHE 17 JANUARI, 2012 KATIKA VIWANJA VYA KARIMJEE NA MAZISHI IFAKARA, KILOMBERO, MOROGORO – TAREHE 18 JANUARI, 2012 

1. UTANGULIZI

Marehemu Mheshimiwa Regia Estelatus Mtema alifariki kwa ajali ya gari katika eneo la Ruvu, mkoani Pwani mnamo majira ya saa 5.30 asubuhi tarehe 14 Januari, 2012. Ofisi ya Bunge baada ya kuthibitisha kifo hicho kupitia Ofisi ya Kamanda wa Polisi Mkoa wa Pwani na baada ya Kuwasiliana na familia, mara moja ilituma Maafisa Waandamizi kwenda katika Hospitali ya Tumbi mkoani Pwani kuuchukua Mwili wa marehemu na kuuleta Muhimbili kuhifadhiwa ikiwa ni pamoja na kufanya maandalizi ya mazishi. Baada ya maandalizi hayo na kwa ushirikiano na familia na uongozi wa Kambi ya Upinzani Bungeni yafuatayo yamekubaliwa kufanyika:- 

2. MWILI KUAGWA NA FAMILIA TAREHE 16 JANUARI, 2012 KATIKA KANISA KATOLIKI SEGEREA

Familia imeandaa Misa ya Marehemu katika Kanisa Katoliki Segerea siku ya Jumatatu tarehe 16 Januari, 2012 kuanzia saa 9 alasiri mpaka saa 11 jioni. Mwili wa Marehemu utaondoka Hospitali ya Muhimbili saa 7 mchana na baadae kurejeshwa tena kwa hifadhi baada ya Misa. 

3. MWILI KUAGWA RASMI KATIKA VIWANJA VYA KARIMJEE  TAREHE 17 JANUARI, 2012

Ofisi ya Bunge imeandaa utaratibu kwa viongozi wa kitaifa, Waheshimiwa Wabunge, Wananchi kuuaga rasmi Mwili wa Marehemu katika viwanja vya Karimjee siku ya Jumanne tarehe 17 Januari, 2012. Shughuli hiyo inatarajiwa kuanza saa 3.00 asubuhi na kuhitimishwa saa 5.30 asubuhi (Ratiba imeambatanishwa kama kiambatisho A). Kama ratiba inavyoonesha, Mwili wa Marehemu utaondoka katika viwanja vya Karimjee saa 5.30 asubuhi mara tu baada ya kuaga katika viwanja vya Karimjee kuelekea Ifakara, Kilombero mkoani Morogoro kwa mazishi. 

4. RATIBA YA MAZISHI YATAKAYOFANYIKA IFAKARA

Ratiba ya tarehe 18 Januari, 2012 ambayo ndio siku ya Mazishi nyumbani kwa Marehemu Ifakara, Kilombero Mkoani Morogoro imepangwa kwa kuzingatia mila na desturi za familia. Ratiba hiyo ni kama ilivyo katika kiambatisho B. Kwa ratiba hiyo, shughuli zimepangwa kuanza saa 5 kamili asubuhi na kukamilika saa 10.30 alasiri. 

5. MAANDALIZI MENGINEYO

Mpaka hivi sasa familia imearifu kuwa Msiba huo umepokelewa kwa hisia kubwa katika eneo alilozaliwa Marehemu Mheshimiwa Regia Estelatus Mtema na kwamba tujiandae kwa ushiriki kwa wakazi wa Kilombero takriban 1000.  Aidha, Ofisi inaendelea na Maandalizi ikiwa imejiandaa kwa ushiriki wa viongozi wa kitaifa Mkoani Morogoro. 

6. SHUGHULI ZA K AMATI ZA BUNGE SIKU YA JUMANNE TAREHE 17 JANUARI, 2012

Kutokana na uzito wa tukio hili, Ofisi ya Bunge inapenda kuutangazia Umma kuwa shughuli za Kamati za Bunge kwa jumanne tarehe 17 Janauari, 2012 ambazo zinafanyika katika Ofisi ya Bunge , Dar es Salaam, zitasitishwa hadi jumatano tarehe 18, Januari, 2012 

Ofisi ya Bunge inaungana na familia ya marehemu katika kipindi hiki kigumu cha majonzi. Mwenyezi Mungu ailaze roho ya marehemu Mhe. Regia Estelatus Mtema, (MB) mahali pema peponi.  Amina.  

Imetolewa na,

Idara ya Habari, Elimu kwa Umma na Uhusiano wa Kimataifa

DAR ES SALAAM

16 Januari, 2012  

KIAMBATANISHO A 

RATIBA YA KUAGA RASMI MWILI WA MAREHEMU SIKU YA JUMANNE

TAREHE 17 JANUARI, 2012 KATIKA VIWANJA VYA KARIMJEE

__________________ 

SN.	MUDA	TUKIO	MHUSIKA
1.	02:00 - 3:00	Ndugu, Jamaa na Wananchi kuwasili	Itifaki
2.	03:00-03:25	Viongozi wa Vyama vya Siasa, Waheshimiwa Wabunge, Manaibu Waziri, Mawaziri kuwasili na kuketi katika nafasi zao	Itifaki
3.	03:25	Kiongozi wa Upinzani Bungeni  kuwasili	Katibu wa Bunge
4.	03:30	Mhe. Naibu Spika kuwasili	Katibu wa Bunge
5.	03:35	Mhe. Spika kuwasili	Mhe. Naibu Spika
6.	03:40	Mhe. Waziri Mkuu kuwasili	Mhe. Spika
7.	03:50	Mhe. Makamu wa Rais kuwasili	Mhe. Spika/Mhe. Waziri Mkuu
8.	03:50	Mwili wa Marehemu kuwasili  kwa gwaride maalum la Sergeant-At-Arms	Katibu wa Bunge
9.	03:50 - 4:00	Sala fupi	Kanisa Katoliki
10.	04:00 - 04:10	Wasifu wa Marehemu	Katibu wa Bunge
11,	04:10 - 04:15	Salamu na Rambirambi za Mhe. Spika	Mhe. Spika
12.	04:15 – 04:40	Salamu na Rambirambi  Vyama vya Siasa vyenye uwakilishi Bungeni:-CHADEMA,CCM, CUF, NCCR – Mageuzi, TLP na UDP Kiongozi wa Upinzani Bungeni Mwakilishi wa Serikali	MC
13.	04:40 - 04:45	Neno la Shukrani toka kwa familia	Mwakilishi wa Familia
	04:45 - 04:50	Utaratibu wa safari	Katibu wa Bunge
14.	04:50 - 05:50	Kuaga Mwili wa Marehemu kulingana na Itifaki	MC
15.	05:50	Mwili wa Marehemu kuondoka Uwanjani pamoja na Waheshimiwa Wabunge, Wanafamilia na Maafisa wanaokwenda Ifakara, Kilombero kwa Mazishi	MC
16.	06:00	Viongozi wa Kitaifa kuondoka kulingana na Itifaki	MC

KIAMBATANISHO B 

RATIBA YA MAZISHI YA MAREHEMU REGIA ESTELATUS MTEMA, MB YATAKAYOFANYIKA IFAKARA, KILOMBERO, MOROGORO TAREHE 18 JANUARI, 2012

______________________________

SN.	MUDA	TUKIO	MHUSIKA
1.	04:00-05:00	Wananchi, Familia na Viongozi wa Kitaifa kuwasili kulingana na Itifaki  Uongozi wa Wilaya na Halmashauri Uongozi wa Mkoa Viongozi wa Vyama vya Siasa Waheshimiwa Wabunge Waheshimiwa Manaibu Waziri Waheshimiwa Mawaziri Kiongozi wa Upinzani Bungeni Mhe. Naibu Spika Mhe. Spika Mhe. Waziri Mkuu Mhe. Rais	Katibu wa Bunge
2.	05:00 - 06:00	Chakula cha Mchana	Wote
3.	06:00 - 07:00	Misa	Kanisa Katoliki, Kilombero
4.	07:00 - 07:10	Wasifu wa Marehemu	Ofisi ya Bunge (Mwajiri)
5.	07:10 - 07:20	Salaam na Rambirambi kutoka Uongozi wa Ofisi ya Bunge	Mhe. Spika
6.	07:20 - 07:30	Salaam na Rambirambi kutoka  kwenye Makundi mbalimbali ya Uwakilishi   Chama cha Demokrasia na Maendeleo (CHADEMA) Vyama vya Siasa vyenye Uwakilishi Bungeni (CCM, CUF, NCCR-Mageuzi, TLP na UDP) Mwakilishi wa Serikali	MC
7.	07:30 - 08:00	Msafara wa Waombolezaji kuelekea Makaburini na Mwili wa Marehemu kwa Mazishi	Wote
8.	08:00 - 08:30	Ibada ya Mazishi	Kanisa Katoliki, Kilombero
9.	08:30 -08:45	Kuweka Mashada ya Maua kulingana na Itifaki
10.	08:45 - 08:50	Shukrani kutoka kwa familia	Mwakilishi wa Familia
11.	08:50	Viongozi Kuondoka kulingana na Itifaki